Mar 9 | BEF | STEP | To Yesu ka mone hiti ma lu epi'ehina: Lusiga lu nolepube. Alihi Hu'mau ai kapo'a amuya hiti le'mo huto hilina kanagu ya'ma bona'i yatai malo nehana'a mone'amagi enali mefilise nehite bu galana'mu yabe. Yesu ya lu'ehina yabe.

Mark 9

1 To Yesu ka mone hiti ma lu epi'ehina: Lusiga lu nolepube. Alihi Hu'mau ai kapo'a amuya hiti le'mo huto hilina kanagu ya'ma bona'i yatai malo nehana'a mone'amagi enali mefilise nehite bu galana'mu yabe. Yesu ya lu'ehina yabe.

Yesuhi gufa'alo sipi fana to eto'ehina

Mt 17:1-13; Lk 9:28-36

2 To yalo, loeyagi loeyagi loeyagi yege yupahi su holago, Yesu Pitanogo Yemesinogo Yonigihi enele'moto buto sipi kosagu tito'a, anaga enubu'anilo gufa'a gulu foto besa lago yege fise'na huto mino'ehibe. 3 To kata'a ana huto besa lago lusi koholina lolo hu'ehibe. Melugu bona'magi kata okala henogo ya suhi huto koholina lolo menohibe. Lusi koholina gofa huto lolo hu'ehina yabe. 4 To Yesu ya huto yege fise'na lolo nohigo, koyapa bomale'i Elaiya hiti Mose hiti enubulo huto hite'atiti Yesu hiti kaga lite nehago bu ge'ahabe. 5 To Pitau Yesuhi ma lu emi'ehina: Oho, babafio. Lali ma hepatoga bati huto nominone. Lali yege goli nohi loe yagi mone yagi gilune. Kaika mone Mosehi mone Elaiyahi mone ya huto gilenogo nokebesifiye? 6 Enali pana'alobomagi enelesa gofa ligo, Pitau koli nohuto hena ka lilube, luto ekesa kehelito ana ka lu'ehibe. 7 To yalo enalitoga sopohi gilago soponuguti nogo moloto ma lu'ehina: Ya'ma bo nani'ni pana'ni nohibe. Nigi moneko pana'ni nibita hu'ehina pana'ni nohinagi ka'a kehelilo. 8 Ya ligo, enali bu ge saga hite'ani fato bomale'i felefa ha'igo, Yesu ai'asigo nohigo bu ge'ahana yabe.

9 To alihi kosaloti nelimigo, Yesu amuya ka lu epito ma luto ka epeki'ehina: Lenali yatai bu ge'ahanana bona'magihi lu meepilo. Alihi nani, Kokulumaguti limi'ohuna Bomofita fili'ohunaguti ho notinogo'ni bati hite ka lu epilabe. 10 Ya ligo, enali kehelite ka lu meepise minete'ani, suguna hite enegekesa yigiba yigiba hite mine'ahabe. Ai fili'ehinaguti ho tilube luto nolina kamofihi hapa'a henana ni'ibe lite enegekesa kehelite ai loka hago ai loka hago hite mine'ahana yabe. 11 To Yesuhi ma lite loka he'ahabe: Enali mono ka negana bona'magi Elaiya yata'a olenogo yabe lite nelana ka henabe lite ya nelabe? 12 Ya lago, ai ka'anilo nona'a ma lu epi'ehina: Ma'naka. Elaiya yata'a oloto asaga'na le'mo bati hilibe luto mono kagu akeye'ahana ni'ibe. To Kokulumaguti limilina Bomomu'i henana keye'ahana ni'ibe? Ai kumu ma lite li'ahanamo ni'ina: Bona'magi enemegesa hi emite luna lana asaga'i hi etelenogo gabu'a sipina gilina'mu yabe. Ai kumu ya luto mono fayanugu keye'ahanamo ni'ibe. 13 To nani ma luto lu lepilugi keheli'ehilo. Elaiya ao su ho'ehinagihe. To olago, enali sibi suhi asaga'na hi ete'ahabe. Asaga'na enegekesa yigi'ahanamofihi suhi ya'ma hi ete'ahana yabe. Mono kalugu ana hi etalabe luto koyapa koyo'ehina ni'ibe. Ai kumu koyo'ehina ka asaga'i ahuto hu'ehina yabe. Yesu ya luto lu epi'ehina yabe.

Yesu mone pana'mofihi komopa'aguti foipa fele le'mo he'mi'ehina

Mt 17:14-21; Lk 9:37-43

14 To alihi enali limite bite asaga pana'alobomagi nehanaga nehetite, babu bona'magi enalitoga ete li gehesa nehago mono ka negana bona'magi enali hiti kenasabo nebigo bu ge'ahana yabe. 15 To nehetigo, asaga bona'magi Yesuhi bu negete'ani yege fite aitoga hololu lite bite be tigi'ahabe. 16 To Yesu pana'alobo'amagihi ma luto enoloka ho'ehina: Lenali enali hiti hena ka lite mine'ahabe? 17 To bo moneuba, li gehesa nehanaguti, ma luto lu emi'ehina: Oho, Babafio. Nani pana'nimo foipa fele komopa'agu nohigo, ka meluse nominabe. 18 To fato fato yupapogu feleuba ekesalo i hekini lolago, ai kana fu tito libi'na goya goya nohuto to baga yogo'a heni sala nokoto to gufa'a kesepu kesepu ilata nohibe. To nani ana pana'ni kaitoga le'moto bilube'mu nohuto'ni ya'ma pana'aloboka, lenali le'mo he'mi etalo luto enoloka honamo enali le'mo bati mehi etese mine'ahana yabe. 19 Ya ligo, ai ma luto lu epi'ehina: Abo. Lenali yatai bona'i nanitoga lenemehi mebina bona'i nehabe. Nani lenalitoga henaki yupahi minelenogomo nanitoga lenemehuba bilibe? To henaki yupahi lenegeba hulenogo ka kehelilabe? Ana pana'mo nanitoga le'mete alo. 20 Ya ligo, enali ana pana'mo aitoga le'mete ago, ana feleuba Yesuhi bu nogoto'a pana'i kalake nohago melugu kanafu tito nokoto kese kese noito, libi'na goya goya huto ko'ehibe. 21 To Yesu ana pana'mofihi afo'afihi ma luto loka ho'ehina: Panaka henaki kanagu ya huto mino'ehibe? To afo'afu: Koyapasana, lagaso'asi nohinati ya suhi lu'ehibe. 22 Ya huto minoba minoba nohigo ana feleuba pana'nimofihi halube'mu fato fato yupahi logogu le'mo laki hu'ehina yabe. To fato fato yupahi nagami hefunugu le'mo nofu tu'ehina. To kaiya le'ehe'malatamo keheli bati nohapiye? To kai keheli bati hulotoka keke'i nolu le'etotoka le'ehe'mobo. 23 Ya ligo, Yesu ma lu emi'ehina: Kai henabe luto keheli bati nohapiye luto noloka hane? Nanitoga keheli ule'ale huto komopa'a nimilina bouba asaga'na bati huto li huto hilina'mu yabe. 24 To pana'mofihi afo'afu ana'asi sipi nogo moloto ma luto lu emi'ehina: Babafio. Kaitoga keheli ule'ale nohube. Aku'i mone keheli sibina nohunagi, nehe'mobo.

25 Ya ligo asaga bona'magi hololu lite hetegete neago, Yesu bu enogoto foipa felemofihi ma luto ka emeki'ehina: Kai foipa fele yale. Ekesa'a baga'a i hekini lo'ahata fele yale. Ma pana'mofihi komopa'aguti he'mi etoto bufa hulotoka aku'i aitoga meobo. He'mi etoto bubo'ma. 26 Ya ligo ana feleuba sipi nogo moloto pana'i kalake gofana huto ho etoto he'mi etoto bufa hulago, ana pana'i fili'ehina legi huto minabe. To asaga bona'magi bu gete: Afilifa hu'ehibe lite li'ahana. 27 To Yesu buto yato lito le'mo saga higo, ana pana'i ho tito bati'na mino'ehina yabe.

28 To alihi Yesu nonugu tilago pana'alobo'amagi suguna hite ma lite loka he'ahana: Lali ana felemofihi he'mi etaluta henabe luto bati mehu'ohune? 29 To ai ma luto lu epi'ehina: Ya'mana felemo amuya kene'i nohina yabe. Lenali fa'mene le'mo he'milana meni'ibe. Hu'mamofitoga yata'a nunumu hite loka helete alihi bati hite le'mo he'milana'mu yabe.

Yesu fililina ka mone hiti lu epi'ehina

Mt 17:22-23; Lk 9:43-45

30 To enali ana hepatogati he'mite bite Galili kapogu kapo melete bi'ahabe. To Yesu: Nani kumu bona'magi kehelilana laga'ni menebesibe luto ligo suguna'i bi'ahabe. Ai pana'alobo kaga lu epito nohigo suguna'i bi'ahana yabe. 31 To ai ma luto kaga lu epi'ehina: Bona'magi alihi nani Kokulumaguti limi'ohuna Bomofita nele'mete bite nahalabe. To nehe fililenogo'ni loeyagi moneyagi yegegu keligu minoloto'ni aku'i ho tilube. 32 Ya ligo, enali ya'ma ka'a enelepise'namofihi mekehelise nehanati to aku'i enelesa'ani ligo hapa'a loka mehese mine'ahana yabe.

Kiyi'afu ai sipi bo minalibe?

Mt 18:1-5; Lk 9:46-48

33 Bite bite Kapaneami hepatoga nehetigo Yesu nonugu tito nominoto'a pana'alobo ma luto enoloka habe: Lali kapogu noototi lenali henabe kaga lite kenasabo bite mine'ahabe? 34 To enali kaga melise mine'ahana. Hena'mube? Enali kapogu neete ya'ma folagaha'anigu kiyi'afu sipi bo minalibe lite kenasabo bite mine'ahana yabe. To ya'mu enelesa'ani ligo, ka melise mine'ahabe. 35 Ya hago Yesu komopa'atu keheliloto meto minoto'a pana'alobo'a 12 magi kehe igo ago ma lu epi'ehina: Kibina bouba fa'menena'mu kibina bo lolo nohifihe? O'e. Ai yata'a fa'mene bo nohuto asaga bona'magihi koko hu epoloto alihi kibina bo lolo nohibe. 36 Ya luloto, lagaso yagapana'i mone le'mo saga huto enali folagaha'anigu le'mo ho tito nu kiloto nohuto ma lu epi'ehina: 37 Bo moneuba nani kumu luto ya'ma yagapana'magihi mone'a be tigito le'moto gulu hilina bouba ai ana huto nebe notigibe. To nani nebe tigilina bouba ai ana huto noho lifi'ehina bo Hu'mau ana huto be notigibe. Yesu ya luto lu epi'ehibe.

Fatehatini lolo mehilina bouba lenalalutinifu nohilibe

Lk 9:49-50

38 To Yoniu ma lu emi'ehina: Babafio. Laliya, bo moneuba kigika hoto foipa fele enele'mo nohe'migo bu gototi: Ya mehubo luto lu laga hu eto'ohuta yabe. Ai lali lemege'i menomalana bo nohinagihe. 39 Ya ligo, Yesu ma luto lu emi'ehina: O'e, ya luto lu laga mehu etobo. Boubafi nigi'ni hoto hetofa suhi topa hose suhi hulata bouba ai aku'i mele'isi nemegeka melilina'mu yabe. 40 Lalitoga megesa hu melimilina bouba lalitoga nominana bo nohibe. 41 Lusiga lu nolepugi keheli'ehilo. Bo moneubafi moneuba lenali Kilisitohi naga'i nehana kumu luto nagami'i mone nesi'asi lepinogo, Hu'mau alihi nona'a hetofana'a emilibe. Nani bona'ni nagami epi'ahatalo yabe luto mina'a emilibe. Yesu ya lu'ehibe.

Mi'mi huse'nauba foipana li huto nohibe

Mt 18:6-9; Lk 17:1-2

42 To ka mone hiti ma luto lu epi'ehina: Aku'i bo moneubafi moneuba ya'ma lagaso yagapana mone le'mo foipa hulenogomo, Hu'mau ana bomofihi gofana huto ka emekiloto osahi emilina'mu yabe. Ana bomofihi lubaha'alo efa kosa sipina nagatu mu tifilete to sipi hefupogu le'mo he'mi ete'ahatita bati hitita'mu yabe. Hu'mau lusina huto halina ni'ibe. 43 To ya huto ni'igo, kayapotu foipana huse bo nohapi, ana kayapo laga hu he'mibo. Kayahi luga luga hiti ni'igo logo loba loba huto mesobose hepatoga bilata bati mehu'ehibe. To kayahi mone kegi'a meni'inogo Hu'mamofihi kapogu tito minoba minoba hilata ya bati huto ni'ibe. 45 To ana huto kigitu foipana huse bo nohapi, ana kigigusaka laga hu he'mibo. Kigi luga luga hiti nohuto logo loba loba huto mesobose hepatoga bilata bati mehu'ehibe. To kigigusa mone kegi'a meni'inogo Hu'mamofihi kapogu tito minoba minoba hilata, ya bati huto ni'ibe. 47 To kubuloti foipana huse bo nohapi, ana kubu li buyu hu he'mibo. Kubuka luga luga hiti nohuto logo mesobose hepatoga bilata bati mehu'ehibe. To kubuka mone kegi'a meni'inogo Hu'mamofihi kapogu tito minoba minoba hilata, ya bati huto ni'ibe. 48 Ya'ma logo hepatogaya logo'a mesobose loba loba huto nolago anaga bilana bona'magihi enugufa'ani pata siba siba nohigo sigifa'magi enugufa neba neba hite nelabe.

49 To anaga bilana bona'magihi enugufa'anilo, lali nose'nagu hege kusu kusu tito nohuta suhi huto, anaga enugufalo logomo kusu kusu tito lalibe. Yesu ya luto lipoti epi'ehina yabe. 50 To ka mone hiti ma luto lu epi'ehina: Hegemoya hetofa nose'na ni'ibe. Aku'i ekesa'a meni'igo, bati menohibe. Ekesa'a meni'inogomo lali hiya'a huto le'mo bati hilune? Le'mo bati hiluta'a meni'ibe. To lenaliya hetofa hege legi hite minete sibina mehise bati hite minalo. Lenali koguna ite minalo. Yesu ya luto lu epi'ehina yabe.